Spiropali përshëndet hapjen e ambasadave të Belgjikës dhe Danimarkës në Tiranë

Ministrja për Europën dhe Punët e Jashtme, Elisa Spiropali, ka përshëndetur vendimet e Belgjikës dhe Danimarkës për të hapur ambasadat e tyre në Tiranë, duke i cilësuar këto hapa si një moment kyç për Shqipërinë dhe për avancimin e integrimit të vendit në Bashkimin Europian.

Përmes një postimi në rrjetin social X, Spiropali shprehu falënderimet e saj të sinqerta ndaj homologëve të saj, Ministrit të Jashtëm belg, Maxime Prévot, dhe Ministrit të Jashtëm danez, Lars Løkke Rasmussen, për vendimet e rëndësishme diplomatike që fuqizojnë prezencën e dy vendeve në Shqipëri.

Ajo theksoi se këto hapa reflektojnë progresin e qëndrueshëm dhe të shpejtë të Shqipërisë drejt integrimit në BE.

“Falënderime të sinqerta për Ministrin e Jashtëm belg dhe Ministrin e Jashtëm Danez për vendimet e rëndësishme për të hapur ambasadat e tyre në Tiranë. Këta hapa vijnë në një moment kyç për Shqipërinë, duke reflektuar progresin e qëndrueshëm dhe të shpejtë të integrimit tonë në BE. Ne e vlerësojmë këtë besim në reformat, stabilitetin dhe kontributin e Shqipërisë në sigurinë rajonale, dhe mezi presim të thellojmë bashkëpunimin tonë dypalësh, si dhe angazhimin tonë brenda NATO-s dhe forumeve të tjera ndërkombëtare, duke çuar përpara angazhimin tonë të përbashkët për një Evropë më të fortë dhe më të sigurt”, shkruan Spiropali.