Spitalla park fotovoltaik, mbyllet ankandi, kontratën e fiton kompania franceze Voltalia

Finalizohet ankandi për ndërtimin e parkut fotovoltaik të Spitallës. Në ministrinë e Infrastrukturës dhe Energjisë janë hapur ofertat e dy kompanive të fundit në garë, ku fituese u shpall francezja, Voltalia me çmimin më të ulët.

Parku fotovoltaik i Spitallës do të ndërtohet nga kompania francezë Voltalia. Kjo kompani ka bërë ofertën më të ulët ekonomike në 29.89 euro për megavat, përkundrejt ofertës tjetër të konsorciumit kinez, Universal Energy dhe HOGN electrical group me 46 euro. 

Ky park me energji diellore do të prodhojë 100 megavat, ku 70 megavat do të blihet nga shteti dhe 30 megavat mund të shiten në treg të lirë nga private, ndërsa interes për të marrë pjesë në garë fillimisht shprehën 20 kompani të huaja.

Parku i Spitallës do të ndërtohet në periferi të Durrësit me një sipërfaqe 120 hektar, ndërkohë që Voltalia është e njëjta kompani që po administron edhe parkun me energji diellore të Karavastasë.