Strategjia e ‘dragoit’, Kina planifikon rritje ekonomike për shpenzimet ushtarake

Kina ka caktuar një objektiv ambicioz për rritjen ekonomike me 5 për qind për këtë vit. Shifra është publikuar bashkë me një seri masash të tjera, që synojnë nxitjen e ekonomisë së gjigandit aziatik.

Ishte kryeministri Li Kiang që i prezantoi në hapjen e Kongresit vjetor të Partisë Popullore. Kreu i qeverisë bëri të ditur se performanca ekonomike e Kinës ishte përballur me vështirësi, disa prej të cilave duhet ende të zgjidhen, me qëllim ringjalljen e bumit ekonomik.

Konkretisht, ekonomia kineze po përballet me rreziqe në tregun e pasurive të patundshme, në borxhin e qeverive lokale dhe ato të sipërmarrjeve të mesme e të vogla në disa zona.

Gjithashtu, një seri masash të tjera synojnë të ndihmojnë në rimëkëmbjen e ngadaltë të vendit pas pandemisë. Përmes planeve të tij, Pekini zyrtar synon të shtojë 12 milionë vende pune në zonat urbane.

Përparësi do të ketë edhe rregullimi i tregjeve financiare, si dhe intensifikimi i kërkimeve për teknologjitë e reja, përfshirë inteligjencën artificiale.

Një tjetër sektor që nuk do të anashkalohet do të jetë ai i mbrojtjes, shpenzimet për të cilin do të rriten me 7.2 për qind përgjatë këtij viti.

Buxheti i Kinës për mbrojtjen po mbikëqyret me vëmendje nga fqinjët e saj dhe Shtetet e Bashkuara, për shkak të synimeve të Pekinit ndaj Tajvanit.

Për dekada me radhë, ekonomia kineze u zgjerua me një ritëm të jashtëzakonshëm, me shifrat që e vendosnin prodhimin e brendshëm çdo vit në një mesatare prej 10 për qind.

Me hapat marramendës, përmes të cilëve tejkaloi Japoninë duke u bërë ekonomia e dytë në botë, Pekini pretendon se kishte nxjerrë miliona njerëz nga varfëria.

Vitin e kaluar, sipas të dhënave qeveritare, ekonomia kineze u rrit me 5.2 për qind, nivel i lartë që megjithatë është i ulët për Kinën. Por, disa kritikë argumentojnë se shifra reale mund të jetë më pak se një e treta e saj.

LEXONI GJITHASHTU:

• Aksident në aksin Kardhiq-Delvinë, makina bie në humnerë dhe shpërthen në flakë
• 5 mijë denoncime për dhunë çdo vit, KLSH: Mekanizmi kombëtar s’ka reaguar siç duhet