Studim i ri: AI ndihmon në zbulimin e hershëm të kancerit të lëkurës

Një studim i ri tregon se inteligjenca artificiale mund të ndihmojë në identifikimin e personave që kanë rrezik më të lartë për të zhvilluar melanomë brenda 5 viteve.

Studiuesit në Universitetin e Goteborgut në Suedi analizuan të dhëna të miliona njerëzve gjatë disa viteve, me qëllim për të parë nëse inteligjenca artificiale mund të parashikojë më herët shfaqjen e kancerit të lëkurës. Ata përdorën jo vetëm të dhëna bazike si mosha dhe gjinia, por edhe informacione të tjera shëndetësore, si historikun e diagnozave dhe përdorimin e medikamenteve.

Rezultatet treguan se modeli i AI ishte më i saktë se metodat tradicionale të vlerësimit të rrezikut. Ai arriti të identifikojë më mirë personat që më vonë u diagnostikuan me melanomë, duke dhënë një saktësi rreth 73%, ndërsa përdorimi vetëm i moshës dhe gjinisë rezultoi më pak i saktë.

Studiuesit theksojnë se në disa raste u identifikuan edhe grupe të vogla njerëzish me rrezik shumë të lartë, ku mundësia për të zhvilluar melanomë brenda 5 viteve ishte dukshëm më e madhe se mesatarja.

Melanoma është një nga format më të rrezikshme të kancerit të lëkurës dhe shpesh lidhet me ekspozimin ndaj rrezeve ultravjollcë, qoftë nga dielli apo nga pajisjet për nxirje artificiale. Ajo mund të përhapet shpejt në trup dhe sa më vonë të zbulohet, aq më të ulëta janë shanset për trajtim të suksesshëm.

Sipas të dhënave në Evropë, melanoma përbën një pjesë të rëndësishme të rasteve të reja me kancer dhe mbetet një problem serioz për shëndetin publik. Për këtë arsye, zbulimi i hershëm konsiderohet shumë i rëndësishëm.

Studiuesit thonë se në të ardhmen inteligjenca artificiale mund të përdoret si mjet ndihmës për mjekët, për të identifikuar më herët personat në rrezik dhe për t’i ftuar në kontrolle më të shpeshta. Megjithatë, ata theksojnë se nevojiten ende studime dhe vendime zyrtare para se kjo metodë të përdoret gjerësisht në sistemin shëndetësor.