Studimi i ri: Ndryshimet klimatike rrezikojnë shëndetin e fëmijëve

Ndryshimet klimatike dhe valët ekstreme të të nxehtit po kërcënojnë gjithnjë e më shëndetin e fëmijëve.

Sipas një studimi të ri shkencor, ekspozimi ndaj temperaturave të larta dhe lagështisë së lartë gjatë shtatzënisë mund të ngadalësojë rritjen te fëmijët, një problem që mund të ketë pasoja afatgjata për shëndetin e tyre.

Hulumtimi, i publikuar në revistën Science Advances, tregon se gratë që janë të ekspozuara ndaj kombinimit të temperaturave të larta dhe lagështisë gjatë çdo tremujori të shtatzënisë, kanë fëmijë që janë mesatarisht 13% më të shkurtër se pritej për moshën.

Studiuesit theksojnë se lagështia e lartë përkeqëson efektin e të nxehtit, pasi trupi nuk mund të ftohet përmes djersitjes. Gratë shtatzëna janë veçanërisht të rrezikuara për shkak të ndryshimeve hormonale dhe mbingarkesës fizike, ndërsa stresi nga nxehtësia mund të çojë edhe në lindje të parakohshme.

Pasojat e nxehtësisë ekstreme janë tashmë të dukshme edhe në Evropë. Vetëm këtë verë, rreth 24,400 persona humbën jetën si pasojë e valëve të të nxehtit, ku sipas shkencëtarëve, ndryshimet klimatike trefishuan numrin e viktimave.

Ekspertët paralajmërojnë se nëse emetimet e gazrave serrë vazhdojnë në nivele të larta, deri në vitin 2050 miliona fëmijë, veçanërisht në Azinë Jugore, mund të përjetojnë ngadalësim të rritjes, duke e kthyer ndryshimin klimatik në një kërcënim serioz për brezat e ardhshëm.