Suedia planifikon burgje për 13-vjeçarët për të goditur bandat kriminale

Suedia, e cila është prekur nga krime të rënda nga bandat kriminale, njoftoi këtë të martë planet për burgosjen e shkelësve që në moshën 13-vjeçare në qendrat e paraburgimit për të rinj, duke filluar nga vera e ardhshme, edhe pse ata nuk mund të mbahen penalisht përgjegjës për shkak të moshës së tyre.

Më parë, qeveria në Stokholm kishte ngarkuar autoritetin kombëtar të burgjeve me krijimin e seksioneve për personat 15 deri në 17-vjeç që kanë kryer krime të rënda.

“Ky mandat tani po zgjerohet për të përfshirë edhe 13 dhe 14-vjeçarët,” njoftoi Ministria suedeze e Drejtësisë.

Suedia për vite me radhë është përballur me bandat kriminale, të cilat shpesh rekrutojnë të mitur për të kryer krime të rënda, përfshirë vrasjet. Sipas legjislacionit aktual, 13 dhe 14-vjeçarët nuk janë penalisht përgjegjës, megjithëse një propozim legjislativ nga qeveria liberale-konservatore e kryeministrit,Ulf Kristersson, synon ta ndryshojë këtë për veprat penale  të rënda.

“Ulja e moshës së përgjegjësisë penale për krimet më të rënda është e rëndësishme jo vetëm për të mbrojtur shoqërinë, por edhe për të ndihmuar fëmijët të largohen nga rruga e krimit,” tha ministri i Drejtësisë, Gunnar Strommer.

“Kur 13-14-vjeçarët vrapojnë me armë, shoqëria duhet të përgjigjet me forcë të plotë,” shtoi Henrik Vinge, kryetar i Komitetit të Drejtësisë dhe anëtar i Demokratëve nacionalistë të krahut të djathtë.

Qeveria njoftoi se fillimisht do të krijohen 100 deri në 150 vende për shkelësit e moshës 13 deri në 17 vjeç. Seksionet e veçanta për të rinjtë pritet të jenë funksionale deri në korrik 2026, me gjashtë qendra paraburgimi të dedikuara për djemtë dhe dy për vajzat.

Ministria shtoi se adoleshentët e vegjël dhe të rritur do të mbahen të ndarë, dhe i gjithë sistemi do të jetë në përputhje me Konventën e OKB-së për të Drejtat e Fëmijëve.

LEXONI GJTIHASHTU:

• Zelensky sot në Suedi për nënshkrimin e një marrëveshje mbi eksportet e armëve
• Suedia akuzon Rusinë për bllokim të GPS-it mbi Detin Baltik