Sulm kibernetik ndaj Agjencisë Bërthamore, njoftojnë autoritetet iraniane

Organizata për Energji Bërthamore e Iranit tha se një server e-mailash i kësaj organizate është hakuar nga një shtet i huaj, raportoi media shtetërore më 23 tetor. Kjo organizatë tha se hakerët kanë publikuar disa informacione në internet, shkruan Reuters. 

Ky njoftim vjen një ditë pasi grupi i hakerëve iranianë, Black Reward, pretendoi se ka hakuar sistemin e brendshëm të postës elektronike të Kompanisë iraniane për Prodhimin dhe Zhvillimin e Energjisë Bërthamore.

Ky grup deklaroi përmes rrjeteve sociale se mbështet protestat që po vazhdojnë në Iran, që u nxitën nga vdekja e 22-vjeçares Mahsa Amini.

Informacionet e publikuara thuhet se përfshijnë “planet e menaxhimit dhe funksionimit të pjesëve të ndryshme të uzinës Bushehr” dhe “kontratat dhe marrëveshjet për zhvillim bërthamor”, që Irani ka lidhur “me partnerët vendas dhe të huaj”.

Organizata për Energji Bërthamore tha se ky sulm kibernetik “ka pasur për qëllim të marrë vëmendjen e publikut”.

Bisedimet midis Iranit dhe fuqive botërore, që synojnë ringjalljen e marrëveshjes bërthamore të vitit 2015, kanë ngecur. Shtetet e Bashkuara thonë se Teherani ka treguar pak interesim për ringjalljen e paktit.

LEXONI GJITHASHTU:

• Genc Ruli, bashkëpunëtor i Sigurimit të Shtetit? Flet ish-deputeti i PD-së
• Ish-deputeti i PD-së: Primaret me simpatizantë, njësoj si patronazhistët