Sulm me granatë në rezidencën e ambasadorit norvegjez në Izrael, autorët në kërkim

Një granatë u hodh në oborrin e shtëpisë së ambasadorit norvegjez në Izrael, në qytetin Herzliya, të enjten, njoftuan zyrtarët ndërsa fatmirësisht, nga incidenti nuk pati të lënduar.

“Një shpërthim ndodhi jashtë rezidencës norvegjeze në Tel Aviv të enjten në mbrëmje,” tha Tuva Bogsnes, Drejtoresha e Komunikimit në Ministrinë e Punëve të Jashtme të Norvegjisë, në një deklaratë për agjencinë AFP.

Ministri i Jashtëm izraelit, Gideon Sa’ar, në një postim në rrjetin social X, njoftoi se ishte në kontakt me ambasadorin norvegjez në Izrael, Per Egil Selvaag, dhe bëri me dije se shtëpia e tij ishte shënjestruar nga “një granatë shrapnel”.

“E dënoj fuqimisht këtë krim të rëndë dhe të rrezikshëm,” tha Sa’ar. “Jam i bindur se Policia Izraelite do të veprojë me vendosmëri për të gjetur sa më shpejt autorët dhe për t’i sjellë para drejtësisë.”

Bogsnes shtoi se asnjë anëtar i stafit të ambasadës nuk u lëndua fizikisht dhe se policia ka marrë në dorë hetimin për incidentin.

LEXONI GJITHASHTU:

• Takim vendimtar në Gjenevë, BE-Iran ballë për ballë pas sulmit izraelit
• Britania e Madhe dhe SHBA-të: Irani nuk duhet të pajiset kurrë me armë bërthamore