Sulm me mjet shpërthyes në Kosovë pas marrëveshjes me Serbinë për energjinë

Një mjet shpërthyes është hedhur mbrëmjen e së enjtes, rreth orës 22:45 në objektin e elektro-distribucionit në veri të Mitrovicës.

Burime për Kosova Press bëjnë me dije se përveç dëmeve materiale, nuk ka të lënduar në njerëz.

Si pasojë e shpërthimit është dëmtuar krejtësisht një transformator dhe disa automjete të cilat kanë qenë të parkuara afër këtij objekti.

“Dyshohet se mjeti shpërthyes është hedhur qëllimshëm nga një ose më shumë persona dhe ka të bëjë me marrëveshjen për energjinë të arritur mes Prishtinës dhe Beogradit ditë më parë në Bruksel. Si rrjedhojë pjesa dërmuese e qytetit ka mbetur pa energji elektrike deri në orët e hershme të mëngjesit”, kanë thënë burimet.

Policia ndodhet në vendin e ngjarjes dhe po zhvillon hetimet, ndërsa është hapur rast për tre vepra penale që ndërlidhen me incidentin.

Më 21 qershor, në Bruksel u arrit marrëveshja për zbatimin e marëvehshjes për energjinë mes Kosovës dhe Serbisë, e cila është nënshkruar në vitin 2013, por nuk kishte gjetur zbatim.

Përmes kësaj marrëveshje të arritur, qytetarët në katër komunat në veri të Kosovës,të banuara më shumicë serbe, që nuk kanë paguar drita nga 1999, detyrohen të paguajnë faturat.

LEXONI GJITHASHTU

• Kurti reagon pas ujdisë për zbatimin e marrëveshjes së energjisë me Serbinë
• Kosova dhe Serbia arrijnë marrëveshjen për energjinë