Sulm me sëpatë në Universitetin e Varshavës/ Humb jetën punonjësja, plagoset roja

Një grua është vrarë në një sulm me sëpatë në Universitetin e Varshavës në Poloni, njoftoi policia.

Universiteti bëri të ditur se viktima ishte një anëtare e stafit dhe u sulmua në ndërtesën kryesore të kampusit mbrëmjen e së mërkurës ndërsa një roje sigurie i universitetit, që shkoi për ta ndihmuar, u plagos rëndë.

Një 22-vjeçar polak është arrestuar ndërsa motivet e ngjarjes mbeten ende të paqarta, megjithëse një prokuror lokal deklaroi se ai ishte student i vitit të tretë në Fakultetin e Drejtësisë, polak, por jo nga Varshava.

Universiteti e përshkroi ngjarjen si një “tragjedi të madhe”. Të enjten u shpall ditë zie dhe mësimi u pezullua. Sulmuesi hyri në kampusin universitar pak pas orës 18:40 me orën lokale (16:40 GMT), dhe më pas shkoi në sallën më të madhe të leksioneve të universitetit, në ndërtesën Auditorium Maximum.

Sipas raportimeve të mediave polake, gruaja e vrarë ishte një pastruese 53-vjeçare, e cila vdiq në vendngjarje. Roja e sigurisë që ndërhyri është 39 vjeç.

Universiteti shprehu tronditjen e thellë për këtë ngjarje.

“Shprehim hidhërimin dhe ngushëllimet tona të thella familjes dhe të afërmve”, deklaroi rektori, Alojzy Nowak.

Ministri i Drejtësisë, Adam Bodnar, ndodhej pranë vendit të ngjarjes duke marrë pjesë në një diskutim paneli në një sallë leksionesh. Ai deklaroi se nuk kishte parë vetë sulmin, por ishte informuar nga oficerët e sigurisë së shtetit për ngjarjen.

Ministri vlerësoi njërin prej oficerëve të tij, i cili vrapoi drejt vendngjarjes për të ndihmuar rojen e universitetit, që ndaloi sulmuesin.

Kryetari i Bashkisë së Varshavës, Rafal Trzaskowski, shprehu gjithashtu tronditjen e tij për atë që e quajti një “krim makabër” në kampus. “Ky sulm brutal duhet të ndëshkohet rëndë,” tha ai.

Universiteti kishte planifikuar të organizonte festivalin vjetor të muzikës, Juwenalia, të premten dhe të shtunën, por ai është anuluar.

LEXONI GJITHASHTU:

• 4 të arrestuar në Poloni për menaxhimin e një rrjeti platformash sulmesh kibernetike
• Përplasi me makinë portën e Jennifer Aniston, 48-vjeçari akuzohet për përndjekje