Sulme kibernetike në banka, Gent Sejko: S’kemi investime nga vende armiqësore

Në komisionin për dezinformimin, Guvernatori i Bankës së Shqipërisë ka dhënë shpjegime lidhur me sulmet e hakerave në sistemin bankar. Ai deklaroi se ka pasur sulme, por nuk kanë dëmtuar sistemin.

Pre e sulmeve kibernetike në Shqipëri ka rënë edhe sistemi bankar. Sipas Guvernatorit të Bankës së Shqipërisë, Gent Sejko sistemi bankar nuk është arritur të goditet nga hakerat dhe është i qëndrueshëm.

 “Ka pasur sulme kibernetike në mënyrë të vazhdueshme. Sistemi bankar, pavarësisht këtyre ndërhyrjeve ka rezultuar i qëndrueshëm dhe nuk është goditur. Me përjashtim të një rasti që është menaxhuar. Sulmet janë të natyrave të ndryshme. Kemi sulme që kanë të bëjnë me marrjen e të dhënave, dhe sulme që kanë të bëjnë me hakërrimin e llogarive bankare. Nuk mund të përcaktohet lehtë. Nuk kemi të dhëna konkretisht nga cilat shtete vijnë”,-tha Gent Sejko Guvernatori i Bankës së Shqipërisë.

Teksa raportonte në komisionin e posaçëm për deziforimimin, kryetari i komisionit Erion Braçe e pyeti për investime me origjinë nga vende jo mike në sistemi bankar dhe jo bankar.

“ Vijnë nga vende të BE, por që origjinën ne kapitaleve e kanë atje matanë. Këtë shqetësim e kanë të gjitha vendet që janë në kufi me Rusinë”,-tha Braçe.

“ Nuk na rezulton të kemi investime të huaja nga vende armiqësorë. Nëse penetrojnë nga vende të tjera këtu, këtë nuk mund ta identifikojmë ne”,-tha Sejko.

Edhe pse tashmë prej 4 vitesh në Shqipëri ekziston një ligj për kriptovalutat apo momedhën dixhitale, tregu ende nuk rezulton të jetë i formalizuar.

“Nuk kemi pasur kërkesa si BSH për kriptovalutën. Sigurisht që tregu financiar ka nevojë për modernizim dhe dixhitalizim. Kriptovalutat janë një nivel më i lartë se tregu shqiptar”,-tha Sejko.

Autoriteti i Mbikëqyrjes Financiare po punon për të përgatitur një projektligj që rregullon veprimtarinë në tregun e kriptoaseteve për ta harmonizuar me direktivat dhe rregulloren e BE-së.

LEXONI GJITHASHTU:

• Bankat përballuan krizën, Gent Sejko: Presim rritje ekonomike 5% këtë vit 
• Guvernatori Gent Sejko: Turizmi është test sesi do të vijë rritja ekonomike