Sulme ruse në Ukrainë, 9 perona të vrarë dhe dhjetëra të plagosur

Të paktën nëntë persona janë vrarë dhe shumë të tjerë janë plagosur në të gjithë Ukrainën nga sulme ajrore nga forcat ruse.

Autoritetet në rajonin e Dnipropetrovskit të Ukrainës thanë të dielën se katër persona, përfshirë dy fëmijë të moshës 11 dhe 14 vjeç, u vranë në një sulm ajror rus të shtunën.

Zyrtarët ukrainas thanë gjithashtu se avionët luftarakë rusë bombarduan një numër kamionësh dhe automjetesh të tjera në rajonin jugperëndimor të Odesës, duke vrarë dy persona dhe duke plagosur tre të tjerë.

Në provincën Kherson, guvernatori Oleksandr Prokudin tha se një person u vra dhe dy të tjerë u plagosën pasi forcat ruse nisën sulme me dronë, artileri dhe ajër në më shumë se 20 vendbanime.

Një raketë balistike, për të cilën autoritetet lokale besojnë se ishte një model Iskander-M me një kokë rakete thërrmuese, ra në periferi të Mykolaiv, duke vrarë një 20-vjeçar dhe duke plagosur 19 persona të tjerë, përfshirë dy fëmijë.

Në vijën e frontit të rajonit Zaporizhzhia, guvernatori Ivan Fedorov tha se një civil u vra, tre u plagosën dhe shtëpitë u dëmtuan pasi sulmet ruse shënjestruan 18 vendbanime.

Këto sulme lanë gjithashtu dhjetëra mijëra banorë pa energji elektrike. Fedorov tha se gati 60,000 njerëz u përballën me ndërprerje të energjisë elektrike, duke shtuar se ekipet e emergjencës do të ndërmarrin riparime sapo situata e sigurisë ta lejojë.

Operatori kombëtar i energjisë në Ukrainë, Ukrenergo, njoftoi ndërprerje të energjisë në të gjithë vendin, të cilat sipas tij ishin rezultat i “sulmeve masive me raketa dhe dronë rusë ndaj objekteve energjetike”.

Ndërkohë, Ukraina nisi gjithashtu sulme ndaj trupave dhe infrastrukturës ruse. Ministria e Mbrojtjes e Rusisë tha se mbrojtja e saj ajrore kapi 164 dronë ukrainas, përfshirë 39 mbi Detin e Zi dhe 26 mbi Krime, gjatë natës.

LEXONI GJTIHASHTU:

• Forcat ukrainase thonë se po mbahen në Pokrovsk mes luftimeve të ashpra
• Rusia: Dërgimi i raketave Tomahawk në Ukrainë nuk ndihmon në asnjë zgjidhje