Sulmi i Iranit, reagon Izraeli: Teherani duhet të digjet sonte

Ministri i Sigurisë Kombëtare të Izraelit, Itamar Ben Gvir ka reaguar pas sulmit me raketa nga Irani. Gvir në një reagim në rrjetet sociale ka shkruar që Teherani duhet të digjet sot.

“Teherani duhet të digjet sonte!” shkroi ai në ‘X’.

Izraeli njoftoi se Irani ka lëshuar raketa drejt tij, në bombardimin e parë të tillë që kur një armëpushim i brishtë hyri në fuqi në fillim të prillit, duke komplikuar përpjekjet e ndërmjetësimit për një marrëveshje për t’i dhënë fund luftës.

“Pak kohë më parë, sirenat u dëgjuan në disa zona në të gjithë vendin, pas identifikimit të raketave të lëshuara nga Irani drejt Shtetit të Izraelit”, tha ushtria në një deklaratë.

Nuk ka raportime të menjëhershme për të lënduar ose dëme materiale nga sulmi. Teherani kishte paralajmëruar për hakmarrje pasi Izraeli të dielën goditi periferitë jugore të Bejrutit në kundërshtim me kërkesën e Uashingtonit disa ditë më parë për t’u tërhequr. Izraeli e quajti këtë një hakmarrje për sulmin e Hezbollahut të mbështetur nga Irani në veri të Izraelit më herët gjatë ditës.