Sulmi me dron në bazën “RAF Akrotiri”, ministri britanik i Mbrojtjes fluturon për në Qipro

Ministri britanik i Mbrojtjes, John Healey fluturoi për në Qipro të mërkurën në mbrëmje për të qetësuar pasojat diplomatike pasi një dron goditi një bazë të RAF-it. Zyrtarët e Mbretërisë së Bashkuar besojnë se droni që goditi bazën RAF në Qipro i shpëtoi zbulimit duke fluturuar ulët dhe ngadalë kur u lançua nga milicia pro-iraniane në Liban ose Irakun perëndimor.

Por një hetim nuk ka qenë në gjendje të përcaktojë në mënyrë përfundimtare se nga është nisur droni i tipit Shahed. Sulmi ndodhi gjatë bombardimeve hakmarrëse iraniane gjatë fundjavës, pasi SHBA-të dhe Izraeli nisën një valë sulmesh ndaj Iranit, duke vrarë udhëheqësin suprem të vendit, Ajatollah Ali Khamenei.

Vizita e Healey vjen mes reagimeve të ashpra në Qipro për sulmin me dron ndaj RAF Akrotiri, i cili ka çuar në evakuimin e familjeve që jetojnë në baza dhe në forcimin e mbrojtjes së saj.

Sulmi i së dielës dhe dy të tjerët të ndërprerë më vonë të hënën në mëngjes, ka të ngjarë të jenë nisur nga grupi militant shiit Hezbollah, i cili mbështetet nga Irani.

Droni, një dizajn iranian i prodhuar me çmim të lirë, përdoret si mjet sulmi me një drejtim. Megjithëse nuk pati të lënduar dhe dëmet ishin të kufizuara, sulmi dhe dështimi për të ndaluar dronin që godiste bazën ka shkaktuar zemërim nga qeveria qipriote.

Të hënën, presidenti i Qipros, Nikos Christodoulides, kritikoi hapur dështimin për të ndaluar dronin dhe tha se vendi nuk kishte ndërmend të merrte pjesë në ndonjë operacion ushtarak.

Mbretëria e Bashkuar ka dërguar anijen HMS Dragon i cili pritet të mbërrijë në Qipro javën e ardhshme, së bashku me dy helikopterë Wildcat me aftësi kundër-dronësh. Franca dhe Greqia kanë vendosur mbështetje ushtarake në vend, duke përfshirë avionë luftarakë F-16 dhe sisteme anti-raketash dhe anti-dronë.