Sulmi ndaj Izraelit, BE do të forcojë sanksionet ndaj Iranit

BE ka rënë dakord të zgjerojë sanksionet ndaj prodhuesve iranianë të dronëve dhe raketave pas sulmit të paprecedentë të Teheranit ndaj Izraelit.

“Është shumë e rëndësishme të bëjmë gjithçka për të izoluar Iranin”, tha presidenti i Këshillit Evropian, Charles Michel, sipas mediave të huaja.

Blloku tashmë ka vendosur sanksione të shumta kundër Iranit, duke përfshirë shitjen e dronëve Rusisë për përdorim në luftën e saj kundër Ukrainës.

SHBA ka lënë të kuptohet se do të vendosë dënime të reja në ditët në vijim.

Sanksionet e reja të BE-së u ranë dakord gjatë një samiti në Bruksel, i cili shënoi takimin e parë midis 27 liderëve të bllokut që nga sulmi i drejtpërdrejtë i Iranit ndaj Izraelit të shtunën, duke përfshirë më shumë se 300 raketa dhe dronë të lëshuar nga Irani, Iraku, Siria dhe Jemeni, të cilat kryesisht u rrëzuan nga Izraeli dhe aleatët e tij.

Teherani ka pohuar se ishte një hakmarrje për një sulm ajror të supozuar izraelit në konsullatën e tij në Siri më 1 prill, në të cilin u vranë 13 persona.

Izraeli – i cili duket se është kundërpërgjigjur vetëm me një ofensivë diplomatike deri më tani – nuk e ka përjashtuar një përgjigje ushtarake.

Por liderët botërorë kanë vazhduar të bëjnë thirrje për përmbajtje, në një përpjekje për të parandaluar një konflikt më të gjerë në Lindjen e Mesme.

LEXONI GJITHASHTU:

• Presidenti i Iranit paralajmëron Izraelin: Çdo lëvizje do sjellë reagim të dhimbshëm
• Izraeli po shqyrton opsionet për t’iu përgjigjur Iranit