Superliga, Kukësi mposht 2-1 Tiranën, ngushtohet diferenca në 6 pikë

Kukësi fitoi me rezultatin 2-1 ndeshjen direkte për kreun e renditjes përballë Tiranës të hënën.

Kur kanë mbetur edhe 4 ndeshje për t’u luajtur diferenca në krye është reduktuar në 6 pikë.

Pjesa e parë ishte e ekuilibruar ku të dyja skuadrat u treguan të kujdesshme por patën edhe rastet e tyre.

Në të dytën verilindorët shtynë më shumë dhe arritën të realizonin fillimisht me Godberg Cooper dhe më pas me Valon Ethemin.

Për skuadrën kryeqytetase reagimi u konkretizua shumë vonë me anë të Michael Ngoo, i cili realizoi në minutat shtesë të ndeshjes.

Në takimet e tjera të ditës së hënë, Bylisi barazoi 1-1 me Partizanin edhe pse e mbyllën me 10 lojtarë.

Teuta në anën tjetër arriti të fitojë minimalisht 1-0 ndaj Skënderbeut. Vendosi goli i Sherif Kallakut, i cili shënoi në pjesën e dytë.  Pas këtij suksesi skuadra durrsake e sheh veten në vendin e tretë.