Superliga në “black-out”, FSHF pezullon transmetimet e ndeshjeve në DigitAlb

Ndeshjet e kategorisë superiore nuk do të transmetohen më në platformën DigitAlb. Ferderata Shqiptare e Futbollit njoftoi mbrëmjen e së shtunës se ka pezulluar transmetimin e ndeshjeve të javës së 29-të në platformën digjitale për mosplotësim të detyrimeve kontraktuale.

FSHF tha se do të merrte përsipër kostot e transmetimit dhe ndeshjet e së dielës do të mund të shihen online në web-faqen e saj.

Në njoftimin e federatës thuhet se ky ndalim i transmetimit do të vijojë deri në përmbushjen e detyrimeve kontraktore. Ky vendim vlen për ndeshjet e kupës së Shqipërisë.

“FSHF dëshiron të nënvizojë se borxhi i akumuluar është i konsiderueshëm dhe se në kushtet kur këto janë të ardhura të drejtpërdrejta të klubeve anëtare, të cilat privohen padrejtësisht prej tyre, aq më shumë në situatën e vështire ekonomike të shkaktuar nga përhapja e COVID-19,” – thuhet në njoftimin e FSHF-së.