Sveçla: Çdo kërcënim të Serbisë do ta përballojmë me aleatët

Ministri i Puinëve të Brendshme të Kosovës,  Xhelal Sveçla ka akuzuar Serbinë për zhvillimet e fundit në veri.

Ai theksoi se çdo lloj kërcënimi nga Beogradi zyrtar, Kosova do ta përballojë me aleatët e saj ndërkombëtarë.

Pasi konfirmoi se nuk ka më barrikada në veri të Kosovës, ministri u shpreh se për situatën e krijuar përgjegjësia rëndon mbi Serbinë. Sipas tij, shumica e zyrtarëve të lartë serbë kanë qenë zyrtarë të lartë edhe në kohën kur Serbia ishte në Kosovë.

“Pozicioni i Kosovës është i qartë. Jemi shtet i pavarur dhe sovran. Njihemi nga shumica e shteteve demokratike. Kemi një zhvillim të kënaqshëm, përkundër zhvillimeve ndërkombëtare. Çfarëdo lloj kërcënimi që të na vijë, ne do ta përballojmë me aleatët tanë. Kemi bashkëpunim me NATO-n. Kemi trupat e KFOR-it. Kosova është e sigurt ndaj çdo inkursioni serb. Jemi të kujdesshëm, por jo të frikësuar”, deklaroi Sveçla.

Pikat kufitare Jarinje dhe Bërnjak në veri të Kosovës, prej ditës së djeshme janë të hapura për qytetarët dhe liria e lëvizjes është e plotë.

Qeveria e Kosovës tha se do të shtyjë zbatimin e vendimeve për lëshimin e dokumenteve për hyrje-dalje për shtetasit e Serbisë që hyjnë në Kosovë dhe atë për ndryshimin e targave serbe, duke filluar më 1 shtator.

LEXONI GJITHASHTU

• Rusia po ndihmon Serbinë për destabilizimin e Ballkanit, sipas Kurtit
• Osmani: Serbia kontrollohet nga Rusia, Putin s’do arrijë të destabilizojë Ballkanin

• Reciprociteti ndër vite, 6 masat që Kosova i vendosi Serbisë që nga viti 2011