Sylvinho plan për promovimin e të rinjve, takim me trajnerët e moshave

1 ditë pasi u prezantua në krye të kombëtares shqiptare, braziliani Sylvinho ka nisur menjëherë nga puna. Përgjatë të martës, ish-mbrojtësi kampion me Barcelonën ka zhvilluar një takim me trajnerët e kombëtareve të moshave.

Në tryezën e përbashkët ishin të pranishëm dhe dy ndihmësit e tij Pablo Zabaleta dhe Dorival Guidoni. Qëllimi kryesor ishte shpalosja e planit që 48-vjeçari ka për të çuar sa më lart kombëtaren shqiptare.

Trajneri u shpreh optimist për këtë bashkëpunim të ri dhe shfaqi entuziazmin e tij për këtë aventurë të re me Shqipërinë. Braziliani theksoi se bashkëpunimi mes trajnerëve të ekipeve kombëtare të moshave dhe Kombëtares A do të jetë shumë i ngushtë për të përgatitur dhe për të afirmuar sa më shumë lojtarë të talentuar.

Gjithmonë kalimi nga moshat tek kombëtarja e madhe ka dashur shumë kohë, ndaj Sylvinho i ka kërkuar kolegëve të tij të tregohen të kujdesshëm. Më tej u njoh edhe me mënyrën e organizimit të gjithë ekipeve të moshave dhe për programin apo metodologjitë stërvitore që ato aplikojnë gjatë vitit, teksa mori informacion edhe për mënyrën se si monitorohen elementët e spikatur të cilët aktivizohen veçanërisht jashtë vendit.

LEXONI GJITHASHTU:

• Dritëhijet e trajnerit Silvinjo, tek Corinthians e kërcënuan tifozët
• FSHF konfirmon brazilianin Silvinjo në krye të Kombëtares