Samir Tahiri kokë turku për integrimin në BE, pretendon avokati

Saimir Tahiri u dënua për t’i treguar Evropës se Shqipëria ka bërë një reformë të denjë në drejtësi dhe i ka plotësuar kushtet për t’u integruar në Bashkimin Evropian.

Këtë pretendoi Maks Haxhia, avokati i ish-ministrit të Brendshëm, Saimir Tahir në emisionin ‘Sot’ në Euronews Albania.

Sipas avokatit, arrestimi i Tahirit i hap rrugën arrestimit të shumë zyrtarëve e ish-zyrtarëve të tjerë.

“Reforma që trumbetohet sot kërkon koka turku. E para t’i thotë Evropës që futëm ministrin e Brendshëm në burg, do fusim dhe ca të tjerë, që plotësuam kushtin për në BE. Dhe e dyta nëse e bëjnë këtë për Tahirin që është i pafajshëm, të tjerë që kanë hedhur edhe një firmë do shkojnë në burg. Se u vendos kufiri në minimum; kur dënohet ministri i brendshëm të tjerët nuk do ta diskutojnë dënimin me burg”, tha avokati.

Haxhia e cilësoi absurd faktin që një ish-ministër i Brendshëm të jetë në të njëjtin vend vuajtjeje dënimi me të burgosurit e tjerët.

Detyra që ka mbajtur sipas tij, i rrezikon jetën Tahirit, ndaj ai duhet të vendoset në një izolim, ‘jo të sigurisë së lartë që të rrijë i mbyllur, por të jetë i shkëputur nga të tjerët’.

“Një njeri që është ministër i Brendshëm mund të vihet në objektiva. Por unë po flas për kujdesin e shtetit dhe dua të them atë shprehjen franceze; që kujdesi nuk është asnjëherë i tepërt”, avokati.

Ai tha se do drejtohen Gjykatës së Strasburgut për të pezulluar ekzekutimin e dënimit të dhënë nga Apeli i Posaçëm.

LEXONI GJITHASHTU:

• Soreca e quan lajm të mirë dënimin me burg për ish-ministrin Tahiri
• Kush janë 3 gjyqtarët që dënuan Tahirin?