Takimi me Kurtin, Vuçiç: Nuk di nëse do të ketë përparim në dialogun me Kosovën

Presidenti i Serbisë, Aleksandër Vuçiç ka komentuar mbi pritshmëritë e takimit të dytë me Kryeministrin e Kosovës, Albin Kurti që do të mbahet më 19 Korrik në Bruksel.

“Duam të bisedojmë, t’i zgjidhim problemet konkrete, nga personat e zhdukur e gjithçka tjetër. Mendoj se përparimi është i nevojshëm, por nëse është i mundur, do ta shohim”, tha Vuçiç.

Në takimin e parë, atë të 15 qershorit, Kurti dhe Vuçiç nuk ranë dakord për asnjë nga pikat e agjendës, por shprehën gatishmërinë për t’i vijuar bisedimet.

Albin Kurti parashtroi një agjendë të re të përbërë nga 4 pika, të cilat janë:

• Gjashtë shtetet e Ballkanit Perëndimor e avancojnë CEFTA-n në SEFTA.
• Kosova dhe Serbia të nënshkruajnë një marrëveshje të përbashkët të paqes duke u zotuar se nuk do ta sulmojnë njëra-tjetrën.
• Pas njohjes së ndërsjelltë midis dy vendeve, të ketë reciprocitet bilateral, përfshirë çështjen e pakicave. Serbët në Kosovë mund të kenë Këshillin e tyre Nacional, siç e kanë shqiptarët dhe boshnjakët në Serbi.
• Për çështjen e të pagjeturve, kreu i delegacionit serb, z. Veljko Odaloviç, të largohet nga detyra dhe të merret në pyetje.

Ndërkohë, pala serbe këmbëngul që Kosova duhet ta zbatojë marrëveshjen për Asociacionin. Por, qeveria e Kosovës akuzon Serbinë se nuk i ka zbatuar marrëveshjet e arritura deri më sot.

LEXONI GJITHASHTU:

• Merren në pyetje zyrtarë të komunës për helmimin në Deçan, sekuestrohen pamjet filmike pranë Ujësjellësit
• Helmimi masiv në Deçan, qeveria e Kosovës dërgon mostra jashtë vendit
• Drejtori i Zyrës për Kosovën në Serbi kërkon leje të vizitojë komunën e Zveçanit