Talebanët paralajmërojnë SHBA-në pas kërcënimeve për ndalimin e shtetasve amerikanë

Talebanët kanë paralajmëruar Shtetet e Bashkuara kundër marrjes së masave kërcënuese pas ndalimit të shtetasve amerikanë në Afganistan.

Suhail Shaheen, ambasadori i talebanëve në Katar, tha se qëllimi i tyre është të arrijnë një zgjidhje paqësore.

Paralajmërimi i Shaheen vjen pasi Sekretari i Shtetit, Marco Rubio, sugjeroi vendosjen e një shpërblimi të madh për kapjen e udhëheqësve talebanë, duke nënkuptuar se numri i pengjeve amerikane mund të jetë më i lartë nga sa është raportuar.

Javën e kaluar, autoritetet afgane liruan dy amerikanë, Ryan Corbett dhe William McKenty, në këmbim të një anëtari taleban të dënuar në SHBA për drogë dhe terrorizëm. Ndërkohë, raportet flasin për ndalimin e të paktën dy amerikanëve të tjerë. Rubio ka kërkuar një përgjigje të ashpër ndaj situatës, duke përmendur mundësinë e një shpërblimi më të madh se ai për Bin Ladenin.

Talebanët ende nuk kanë publikuar numrin e saktë të të ndaluarve të huaj, ndërsa tensionet mes dy palëve mbeten të larta.

LEXONI GJITHASHTU:

• Administrata amerikane po negocion një shkëmbim të burgosurish me talebanët
• SHBA urdhëron pezullimin e ndihmës ndërkombëtare, bëhen vetëm dy përjashtime