Tarifat 100%, reagon Kina: Nuk i trembemi kërcënimit të Trump

Kina deklaroi të dielën se nuk do të tërhiqet përpara kërcënimit për 100 për qind tarifa tregtare të bërë nga presidenti Donald Trump, të cilit i bëri thirrje t’i zgjidhë problemet dhe jo t’i komplikojë ato.

“Qëndrimi i Kinës është i pandryshuar. Ne nuk duam një luftë tarifash, por nuk kemi frikë prej saj”, deklaroi Ministria e Tregtisë përmes një postimi online.

Reagimi i Pekinit erdhi dy ditë pasi Trump kërcënoi se do të rriste taksat mbi importet nga Kina nga 1 nëntori, si përgjigje ndaj vendimit të kufizimit që vendi aziatik i bëri eksportit të mineraleve të rralla, një përbërës kyç për pajisjet teknologjike dhe ato ushtarake.

“Rikthimi i vazhdueshëm tek kërcënimi me tarifat nuk është mënyra e duhur për të shkuar mirë me Kinën”, vijoi më tej deklarata e Ministrisë së Tregtisë.

Sipas saj, nëse Shtetet e Bashkuara këmbëngulin me këtë praktikë, Pekini do të sigurohet që të marrë masa reciproke për të mbrojtur të drejtat dhe interesat e tij legjitime.

Shkëmbimi i kërcënimeve ka gjasa të zhbëjë planet për një takim mes presidentëve Donald Trump dhe Xi Jinping, si dhe t’i japë fund armëpushimit tregtar, që u arrit në prill, kur tarifat rrezikuan të shkonin 100 për qind.

Trump ka vendosur tarifa mbi importet nga shumë vende këtë vit, në përpjekje për të fituar në këmbim koncesione. Nga ana tjetër, Kina ka qenë një nga të paktat vende që nuk është tërhequr, duke besuar tek forca e saj ekonomike.

LEXONI GJITHASHTU:

• Pse prodhuesi kryesor i çipave të IA është i përfshirë në luftën SHBA-Kinë?
• Përshkallëzim tregtar, Trump njofton tarifë shtesë 100% ndaj Kinës