Të besuarit e Trump takime me rivalët politikë të Zelenskyt, zbardhen prapaskenat

Katër anëtarë të lartë të stafit të ish-Presidentit të SHBA, Donald Trump, kanë zhvilluar takime me figura të njohura të opozitës ukrainase, raportoi Politico të mërkurën. Sipas raportit, bisedimet janë mbajtur me lideren e opozitës Yulia Tymoshenko dhe me anëtarë të lartë të partisë së ish-Presidentit Petro Poroshenko. Këto zhvillime janë konfirmuar nga tre ligjvënës ukrainas dhe një ekspert i politikës së jashtme të Partisë Republikane në SHBA.

Takimet kanë patur në fokus diskutimin mbi mundësinë e mbajtjes së zgjedhjeve presidenciale të parakohshme në Ukrainë, duke reflektuar tensionet e vazhdueshme në skenën politike të vendit.

Nga ana tjetër, Presidenti i Ukrainës, Volodymyr Zelensky, deklaroi të mërkurën se ka pasur “lëvizje pozitive” në bashkëpunimin me Shtetet e Bashkuara, duke lënë të hapur mundësinë e një takimi tjetër mes dy palëve në të ardhmen e afërme.

Kyivi ka shprehur gatishmërinë për të riparuar mardhëniet me aleatin e tij kryesor ushtarak, pas polemikave të fundit mes Zelensky-t dhe Trump mbi strategjinë e përfundimit të konfliktit me Rusinë. “Sot ekipet tona ukrainase dhe amerikane filluan punën për një takim. Andriy Yermak dhe Mike Waltz folën”, deklaroi Zelensky, duke iu referuar shefit të tij të stafit dhe këshilltarit amerikan të sigurisë kombëtare.

Përmes një postimi në rrjetin social X, Yermak konfirmoi se kishte “ndarë pikëpamje mbi çështjet e sigurisë dhe përputhjen e pozita” me Waltz, duke theksuar planifikimin e një takimi mes zyrtarëve ukrainas dhe amerikanë për të vazhduar këtë dialog.

Ndërkohë, kancelari në largim i Gjermanisë, Olaf Scholz, dhe Presidenti Zelensky, zhvilluan një bisedë mbi rolin e Shteteve të Bashkuara në negociatat për paqen mes Ukrainës dhe Rusisë. Sipas një zëdhënësi të qeverisë gjermane, “të dy liderët ranë dakord mbi rëndësinë e rolit udhëheqës të Presidentit të SHBA, gjithashtu me një vështrim për arritjen e një armëpushimi të shpejtë dhe një paqeje të qëndrueshme për Ukrainën”.

Pas bisedës, Zelensky deklaroi se kishte zhvilluar “një bisedë të sinqertë mbi çështje të ndryshme dhe vizionin tonë për arkitekturën e sigurisë në të ardhmen” me Scholz. Ai gjithashtu theksoi se Ukraina është e gatshme të punojë në koordinim me SHBA për të siguruar një paqe të qëndrueshme.

“Ne të gjithë duam një të ardhme të sigurt për popullin tonë. Jo një armëpushim të përkohshëm, por fundin e luftës njëherë e përgjithmonë. Me përpjekjet tona të koordinuara dhe udhëheqjen e SHBA, kjo është plotësisht e realizueshme”, u shpreh ai.

Kancelari Scholz nga ana e tij e ripërsëriti mbështetjen e Gjermanisë ndaj Ukrainës, duke nënkuptuar vazhdimin e angazhimit gjerman në mbështetje të stabilitetit dhe sigurisë së vendit.

Gjithashtu, Zelensky zhvilloi një bisedë telefonike me kancelarin e pritshëm të Gjermanisë, Friedrich Merz, për të diskutuar bashkëpunimin e ardhshëm mes dy vendeve.

LEXONI GJITHASHTU:

• Zbardhen negociatat Rusi-SHBA, kërkesa që Trump i bëri Putinit në telefon për Iranin
• “BE-ja, objektiv strategjik”- Erdogan: Evropa s’mund të jetë fuqi globale pa Turqinë
• “Putin do trimërohet”- Reagime të ashpra në Kiev pas pezullimit të ndihmës nga SHBA