Të dielën votojnë 59 milionë gjermanë, cili nga katër kandidatët do drejtojë vendin

Gjermania voton këtë të diel për të zgjedhur kancelarin e ardhshëm, pas shpërbërjes së parakohshme të koalicionit trepartiak të kancelarit Olaf Scholz në nëntor.

Rreth 59.2 milionë qytetarë do të hedhin votën e tyre në zgjedhjet parlamentare, të cilat do të përcaktojnë drejtimin e ri politik të vendit.

Në Bundestagun me 630 anëtarë, shumica e re parlamentare do të zgjedhë liderin që do të drejtojë Gjermaninë në një periudhë sfidash të mëdha ekonomike dhe gjeopolitike.

Emigracioni dhe ekonomia kanë dominuar fushatën zgjedhore, ndërsa rritja e partive të së djathtës ekstreme konsiderohet një shqetësim për Bashkimin Evropian.

Kandidatët për kancelar

🔹 Alice Weidel (AfD) – Kandidatja e ekstremit të djathtë njihet për qasjen e saj kundër rrymës dhe admirimin për politikat e Margaret Thatcher. Megjithatë, 45-vjeçarja, e lidhur me një grua nga Sri Lanka dhe nënë e dy fëmijëve të adoptuar, përfaqëson një imazh të diskutueshëm brenda partisë së saj. Shanset e saj për të fituar mbeten minimale.

🔹 Robert Habeck (Të Gjelbrit) – Zëvendëskancelari aktual dhe ministër i Ekonomisë, i njohur gjithashtu për kontributin e tij në letërsinë policeske. Ai synon të forcojë axhendën ekologjike dhe reformat ekonomike.

🔹 Olaf Scholz (SPD) – Kancelari aktual kërkon një mandat të dytë, pavarësisht kritikave për menaxhimin e krizave dhe komunikimin e tij të vakët. 66-vjeçari beson se përvoja e tij mund ta mbajë në pushtet.

🔹 Friedrich Merz (CDU) – Kryetari i Unionit Kristian-Demokrat, i cili dikur humbi garën kundër Angela Merkelit, është favorit në sondazhe. Ai mbështet politika ekonomike liberale dhe synon të reduktojë burokracinë për të nxitur zhvillimin ekonomik.

Përtej kufijve të Gjermanisë

Rezultati i këtyre zgjedhjeve do të ketë ndikim të gjerë, jo vetëm për Gjermaninë, por edhe për politikën evropiane dhe marrëdhëniet transatlantike.

Një qeveri e qëndrueshme në Berlin pritet të luajë një rol kyç në reagimin e BE-së ndaj krizës në Ukrainë, politikave të administratës së re amerikane dhe sfidave të NATO-s.

LEXONI GJITHASHTU:

• Qeveria e re gjermane! Si do të krijohet koalicioni? E zbulon diplomati
• Zgjedhjet në Gjermani, si do ndikojnë në të ardhmen e Evropës