Të hiqet ’20 përqindëshi’ diskriminues ndaj shqiptarëve në RMV, thotë analisti

Faktori shqiptar në Maqedoninë e Veriut duhet të jenë në përpjekjen për të luftuar për heqjen nga Kushtetuta të ’20 përqindëshit’ që diskriminon shqiptarët.

Kështu tha në emisionin ‘Sot’ Seladin Xhezairi, analist nga RMV, teksa diskutohej mbi rezultatin e fundit të censusit në RMV, ku shqiptarët rezultojnë 29.5% e popullsisë.

Ai solli në vëmendje faktin se censusi është politizuar nga qarqet turke dhe bullgare, të cilët kanë depozituar edhe ankesa zyrtare për rezultatet e minoriteteve të tyre.

Fakti që pala bullgare ka kërkuar korrigjim me përfshirjen e elementit bullgar në Kushtetutë, sipas analistit duhet të shfrytëzohet nga faktori shqiptar në RMV për të forcuar pozitat e shqiptarëve.

“Ndryshimi i Kushtetutës do të ishte rast i mirë që faktori politik shqiptar në RMV të dalë me një zë për të tërhequr ‘20 përqindëshin’ diskriminues ndaj shqiptarëve. Jam i bindur se shqiptarët po faktorizohen në Ballkan, por varet nga drejtuesit e tyre se çfarë do të arrijnë të bëjnë”, tha analisti.

Në RMV e drejta për përdorimin e gjuhës dhe flamurit nuk garantohet për shqiptarët, por “për popujt që përbëjnë të paktën 20% të popullsisë së shtetit”.

Tani shqiptaret duan ta ndryshojnë këtë. Ata kërkojnë të thuhet qartë se përdoret gjuha shqipe dhe flamuri etnik shqiptar.

LEXONI GJITHASHTU:

• Mbi 29% e popullsisë në RMV shqiptarë, publikohen të dhënat e Censusit
• Mësuesit në Kosovë dhe RMV paralajmërojnë grevë