”Të lodhur nga kritikat”, Hungaria-BE-së: Mjaft ndërhytë në çështjet e brendshme

Hungarisë i ka ardhur në majë të hundës nga kritikat e Perëndimit.

Kështu ka deklaruar ministri i Jashtëm i vendit Peter Szijarto, i cili ka nënvizuar se kritikat e vazhdueshme mbi çështjet demokratike dhe kulturore në Hungari po cenojnë bashkëpunimin, sidomos mbi çështje si NATO dhe Rusia.

Budapesti dhe Brukseli kanë kryqëzuar shpatat për një sërë çështjesh në vitet e fundit, me partinë në pushtet Fidesz që akuzohet për qeverisje autoritare, keqpërdorim të fondeve të BE-së dhe devijim të linjës së bllokut lidhur me luftën në Ukrainë.

Szijarto ka deklaruar se Hungaria nuk ka votuar ende për të lejuar anëtarësimin e Finlandës dhe Suedisë në NATO pasi ligjvënësit hungarezë janë të lodhur me komentet e Perëndimit për çështjet e tyre të brendshme.

Sidoqoftë, Parlamenti në Budapest do të votojë në favor të aderimit të Finlandës në aleancën ushtarake javën e ardhshme, pavarësisht asaj që e ka quajtur “mungesës së respektit” të elitave politike në Helsinki dhe Stokholm.

“Kur politikanët finlandezë dhe ata suedezë vënë në dyshim natyrën demokratike të sistemit tonë politik është e papranueshme”, ka deklaruar më tej Szijarto.

Ndërsa sa i takon anëtarësimit të Suedisë, ministri i Jashtëm ka shtuar se nuk dihet se kur ajo do të aprovohet.

BE, që përfshin 21 vende anëtare të NATO-s, ka ngrirë fonde me vlerë miliarda dollarë për Budapestin, duke akuzuar kryeministrin Orban se po çrrënjos lirinë e medias.

LEXONI GJITHASHTU:

• Hungaria nuk do ta arrestojë Vladimir Putin: S’ka bazë ligjore
• Hungaria shtyn sërish votimin për anëtarësimin e Suedisë dhe Finlandës në NATO