“Të ndërpritet ofensiva”, G7-a mbështet zgjidhjen me 2 shtete, por jo armëpushimin

Grupimi i vendeve më të pasura, G7, i ka bërë thirrje Izraelit që të ndërpresë ofensivën në Gaza për qëllime humanitare.

Në takimin e zhvilluar në Japoni, liderët tejkaluan mosmarrëveshjet mbi luftën, por në deklaratën finale nuk arritën të mbështesnin thirrjen për armëpushim. Por sekretari amerikan i Shtetit, Antony Blinken deklaroi se Izraeli nuk duhet ta pushtojë sërish Gazën.

“Ministrat e G7-s riafirmuan mbështetjen e palëkundur për të drejtën dhe detyrimin e Izraelit për t’u vetëmbrojtur dhe për t’u siguruar që 7 tetori të mos përsëritet. Ne ramë të gjithë dakord se ndërprerjet humanitare do të ndihmonin në mbrojtjen e civilëve palestinezë, do të garantonin vijimin e asistencës humanitare, do të lejonin largimin e shtetasve tanë dhe do të lehtësonte lirimin e pengjeve”,- tha Antony Blinken, sekretari amerikan i Shtetit.

Ministrat e Jashtëm të 7 vendeve dënuan gjithashtu rritjen e dhunës së kolonëve ekstremistë ndaj palestinezëve si dhe përsëritën se një zgjidhje me dy shtete, Izrael dhe Palestinë, është rruga e vetme drejt një paqeje afatgjatë e të qëndrueshme.

LEXONI GJITHASHTU:

• Mori kontrollin e rajonit, Azerbajxhani mban paradë ushtarake në Karabak
• Progres raporti i Komisionit Europian për Shqipërinë, reagon Bardhi