Progres raporti i Komisionit Europian për Shqipërinë, reagon Bardhi

Kreu i Grupit Parlamentar të PD-së, Gazment Bardhi ka reaguar në lidhje me Progres Raporti i vitit 2023 për Shqipërinë.

Në një postim që ka bërë në rrjetet sociale, shkruan se raporti konfirmon shqetësimet e drejta të opozitës për mungesën e lirisë në Parlament.

Për këtë progres-raport ai hedh fajin mbi kreun e qeverisë Edi Rama.

“Shqipëria nuk plotëson asnjë standard europian politik, ekonomik dhe social. Skaneri i Komisionit Europian e nxjerr Shqipërinë e drejtuar nga Edi Rama si vendin me sëmundje të rënda të demokracisë.

Raporti konfirmon shqetësimet e drejta të opozitës për mungesën e lirisë në Parlament, për kufizimin e së drejtës kushtetuese për ngritjen e komisioneve hetimore, për përjashtimet arbitrare të deputetëve, për mungesën e përparimit në reformën zgjedhore.

Komisioni Europian vendos gishtin në plagë, kur vlerëson situatën alarmante të korrupsionit dhe krimit të organizuar. Niveli i Shqipërisë renditet nga Komisioni Europian poshtë mesatares në të dyja këto fusha jetike, sepse qeveria e Edi Ramës nuk ka në axhendë luftën serioze kundër krimit dhe korrupsionit. Përmes tyre, Edi Rama ble zgjedhjet dhe zgjat pushtetin e tij, që po rrënon çdo ditë shqiptarët.

Së fundi, e shoh të drejtë shqetësimin e Komisionit Europian për gjendjen e opozitës, prandaj është detyrim për ne që të shndërrohemi në një alternativë të besueshme qeverisëse, duke filluar më së pari në bërjen funksionale të opozitës. Sa më shpejt”-tha Bardhi.

LEXONI GJITHASHTU: 

• Kush e braktisi foshnjën në Tiranë? Gazetarja: E gjeti një burrë që po pinte cigare
• Marrëveshja për emigrantët| Rama për Rai News: Nuk e kemi bërë për të hyrë në BE