Të paktën 15 viktima pas sulmit në një shkollë fillore në Teksas

14 nxënës dhe 1 mësues janë vrarë pas një sulmi në një shkollë fillore në Teksas të Shteteve të Bashkuara, raporton BBC.

Ngjarja ka ndodhur në Uvalde, 183 kilometra larg San Antonios,  në 11:32 të paradites sipas orës lokale.

Shkolla Robb Elementary School frekuentohet nga nxënës të moshës 8 deri në 11 vjeç.

Guvernatori i Teksasit, Greg Abbott, ka deklaruar se autori është Salvador Ramos, një 18-vjeçar i zonës.

Sipas deklaratës së Abott, Ramos ka braktisur automjetin me të cilin po udhëtonte dhe është futur në shkollë i armatosur. Autoritetet dyshojnë se 18-vjeçari ka përdorur një pistoletë dhe pushkë.

Drejtori i policisë Pete Arredondo ka dalë në një konferencë për shtyp ku ka konfirmuar se autori është vrarë dhe mendohet se ka vepruar i vetëm.

Një grua 66-vjeçare dhe një nxënëse 10 vjeç janë në gjendje kritike për jetën, tha drejtori i policisë.

Update on the shooting at Robb Elementary School in Uvalde: at University Hospital, one patient, a 66-year-old woman, is in critical condition.

The other patient is a 10-year-old girl, also in critical condition.

— University Health (@UnivHealthSA) May 24, 2022

Maji ka shënuar një sërë ngjarjesh të përgjakshme në Shtetet e Bashkuara ku vetëm dhjetë ditë më parë 10 persona humbën jetën dhe 3 u plagosën në Nju Jork në një akt që dyshohet se ishte një sulm kundër personave me ngjyrë.