Të rinjtë e rafting-ut shoqërohen nga policia, ndërpritet misioni humanitar në Berat

Një grup të rinjsh, të gjithë me guida të certifikuara në rafting, ndërmorën një nismë solidariteti për të ardhur në ndihmë familjeve të prekura nga prurjet e larta të lumit Osum, pas reshjeve të dendura të ditëve të fundit.

Me varkat e tyre, ata u futën në rrjedhën e lumit, duke monitoruar situatën nga afër dhe duke ofruar ndihmën e parë në rast nevoje.

Megjithatë, ky mision humanitar nuk u prit mirë nga strukturat e rendit. Të rinjtë u shoqëruan në ambientet e Drejtorisë Vendore të Policisë Berat, me pretendimin se kishin shkelur rregullat e sigurisë dhe nuk kishin marrë autorizim për hyrjen në rrjedhën e lumit në kushte të rrezikshme.

Aktualisht, pesë të rinj, së bashku me gazetarin Grisel Zenuni, i cili po raportonte mbi këtë iniciativë, mbahen prej disa orësh në ambientet e Komisariatit të Policisë.

Ata pretendojnë se nuk janë njoftuar më parë për ndalimin e lundrimit në Osum dhe e konsiderojnë këtë veprim të papritur.