Të shtëna me armë pranë Ambasadës Amerikane në Bejrut, ndërhyn ushtria

Këtë të mërkurë u raportuan të shtëna me armë zjarri pranë Ambasadës Amerikane në Awkar, në verilindje të Bejrutit, ndërsa ushtria libaneze preu rrugën që të çonte në zonë, raportuan mediat libaneze.

Informacionet fillestare tregojnë se të shtënat me armë nuk ishin të lidhura me ndonjë kërcënim apo zhvillim sigurie që përfshinte ambasadën, raportoi gazeta libaneze An-Nahar.

An-Nahar tha se personeli i ushtrisë libaneze hapi zjarr ndaj dy personave që dyshohet se u përpoqën të iknin nga pika e kontrollit Awkar pasi refuzuan të zbatonin urdhrat. Ushtria më pas i arrestoi ata.

Autoritetet libaneze janë pala e autorizuar për t’iu përgjigjur pyetjeve në lidhje me natyrën e incidentit, tha një burim në Ambasadën Amerikane për An-Nahar.

Disa media libaneze, raportuan më parë për të shtëna me armë zjarri në afërsi të ambasadës dhe thanë se ushtria libaneze kishte prerë rrugën që të çonte në zonë. Deri më tani, autoritetet libaneze nuk kanë lëshuar asnjë deklaratë zyrtare.