Tension diplomatik midis Çekisë e Rusisë, dëbohen zyrtarët e ambasadave

Lajme që supozohen të rreme kanë shkaktuar tension midis Çekisë dhe Rusisë, duke i bërë dy vendet të përzënë disa diplomatë.

Çekia përzuri dy zyrtarë të ambasadës ruse më 5 qershor, pasi u akuzuan se kishin shpërndarë lajme të rreme në lidhje me një komplot për vrasjen e tre politikanëve në Pragë, përfshi kryebashkiakun e qytetit, Zdenek Hrib.

Pas kësaj lëvizjeje, Ministria e Jashtme ruse thirri ambasadorin çek për sqarime dhe më pas shpallën dy diplomatë çekë “non grata”, duke u lënë kohë deri të mërkurën që të largohen nga vendi bashkë me familjet.  

“Kjo masë është përgjigje ndaj veprimeve armiqësore të Çekisë, duke u bazuar mbi akuza absurde dhe të pavërteta”, deklaroi pala ruse.

Lajmet në mediat çeke thoshin se Rusia po i thurte ato plane vrasjeje nëpërmjet helmimit pasi ishte zemëruar nga vendimi i bashkisë së Pragës për të hequr statujën e Ivan Stepanovic Konevit, një komandanti sovjetik që kishte ndihmuar me çlirimin e Republikës Çeke nga nazistët.

Pas lajmeve, kryebashkiaku i Pragës dhe dy politikanë të tjerë u morën në mbrojtje nga forcat e rendit.

Pavarësisht vërtetësisë së lajmeve, heqja e statujës shkaktoi përplasje diplomatike midis Rusisë dhe Çekisë. Moska nisi një hetim për “përdhosje publike të simboleve të lavdisë së ushtrisë ruse”.

Ministri rus i mbrojtjes, Sergei Shoigu, i kërkoi Pragës që ta dërgonte statujën në Moskë.

Një tjetër përplasje ishte krijuar dhe në shkurt, kur sheshit përpara ambasadës ruse në Pragë iu ndryshua emri dhe iu vendos ai i ish-udhëheqësit të opozitës ruse, Boris Nemtsov, i cili u vra në vitin 2015.