Tentuan të vidhnin një automjet në Dhërmi, arrestohen 25-vjeçari dhe 17-vjeçarja

Një tentativë për vjedhjen e një automjeti është parandaluar nga Policia në Dhërmi, ndërsa në pranga kanë rënë një 25-vjeçar dhe një 17-vjeçare, të dyshuar si bashkëpunëtorë në këtë veprimtari kriminale.

Sipas njoftimit zyrtar, shërbimet e Policisë reaguan menjëherë pas marrjes së informacionit për vjedhjen e një automjeti tip “Land Rover”, duke bërë të mundur lokalizimin dhe ndalimin e tij në kohë.

Gjatë ndërhyrjes, drejtuesja e automjetit nuk iu bind urdhrave të Policisë dhe, në përpjekje për t’u larguar, shkaktoi dëmtime në automjetin e vjedhur.

Pas hetimeve, 25-vjeçari u arrestua për disa vepra penale, përfshirë “Vjedhje e mbetur në tentativë”, “Mosbindje ndaj urdhrit të Policisë” dhe “Largim nga vendi i aksidentit”. Ndërkohë, 17-vjeçarja u arrestua për “Vjedhje e mbetur në tentativë”, “Drejtim të parregullt të mjetit”, “Shkatërrim të pronës” dhe “Mosbindje ndaj urdhrit të Policisë”.

Nga hetimet paraprake rezulton se dy të rinjtë kishin shkuar në Dhërmi me një automjet tip “Benz”, fillimisht me qëllim blerjen e automjetit. Duke përfituar nga mungesa e pronarit, 17-vjeçarja e kishte marrë mjetin pa leje dhe ishte larguar.

Policia bëri me dije se në cilësinë e provës materiale janë sekuestruar dy automjetet, ai i autorëve dhe automjeti që u tentua të vidhej, ndërsa hetimet vijojnë për zbardhjen e plotë të rrethanave.