Tetë vjet me sytë nga Al Hol, 5 fëmijë të familjes Shuli nga Pogradeci ende në kamp

Teksa kthimet e fëmijëve të bllokuar në kampin Al Hol në Siri vijojnë, Dylber Shuli 82-vjeçari nga fshati Zagorçan i Pogradecit sërish nuk ka mundur të marrë lajmin e mirë se 5 mbesat e nipërit e tij po vinin.

Pas 8 vitesh pritje me shpresën se ata do kthehen tashmë ai është lodhur nga mosha, sëmundjet, por edhe pritja e gjatë. Nga hera e fundit që ai ka folur për mediat është shumë herë më i lodhur dhe i zhgënjyer që ende nuk ka një lajm për kthimin e 5 fëmijëve të shtëpisë Shuli.

“Fëmijët e Krenar Shulit janë të pafajshëm. Janë fëmijë 12 vjeç e poshtë. Do t’i ndihmojë, do t’i sjellim”, u shpreh ai për nipërit.

Dylberi megjithatë, teksa tregon në foto nipërit e tij, ende ka shpresë se nuk do t’i mbyllë sytë deri ditën që t’i shoh ata në oborrin e shtëpisë thotë ai edhe pse këtë ditë e sheh të largët

Djali i Dylberit, Krenar Shuli ka ikur para 8 vitesh bashkë me bashkëshorten e tij dhe 4 fëmijë. Aktualisht në kampin e Al Hol janë 5 fëmijë të familjes Shuli. Vajza e madhe lindi një djalë atje, pasi e martuan në moshën 12-vjeçare.

LEXONI GJITHASHTU:

• ‘Nuk janë bashkëpunues’, kreu i Antiterrorit thotë se mbi 30 persona të tjerë ndodhen në Al-Hol
• Pesë gra dhe 14 fëmijë riatdhesohen nga kampet e ISIS në Siri, Rama: Operacioni, i rrezikshëm