Thashethemet për vdekjen e tij dhe 6 gishtat, Netanyahu publikon një video të re me qytetarë

Kryeministri izraelit Benjamin Netanyahu publikoi të hënën një video të re në rrjetin social X, ku shihet duke bashkëvepruar me qytetarë, të shoqëruar me mbishkrimin: “Duke iu përmbajtur udhëzimeve dhe duke fituar së bashku”.

Publikimi i saj vjen pasi Netanyahu kishte postuar më herët një tjetër video në mediat sociale, ku shfaqej duke pirë kafe dhe duke komentuar thashethemet që qarkullonin për vdekjen e tij. Megjithatë, video e publikuar të dielën shkaktoi kritika nga disa përdorues të internetit, të cilët ngritën dyshime se pamjet mund të ishin gjeneruar artificialisht.

Në video, Netanyahu shihet duke porositur një kafe në kafenenë Sataf në Jerusalem, ndërsa tallet me thashethemet për vdekjen e tij. Në pamje ai dëgjohet duke i thënë shitësit: “Shkëlqyeshëm, faleminderit”, ndërsa më pas pyet kameramanin: “Çfarë më pyetët?”

Kur i thuhet se disa raportime pretendojnë se ai ka vdekur, Netanyahu përgjigjet me humor: “Po vdes për kafe. Po vdes për popullin tim. Si po sillen ata? Fantastike. A doni të numëroni gishtat?”

Video u publikua në një kohë kur diskutimet në rrjetet sociale për vdekjen e Netanyahut u amplifikuan edhe nga agjencia shtetërore iraniane e lajmeve IRNA, e cila shkroi në X se Garda Revolucionare Islamike (IRGC) ishte betuar ta vriste Netanyahun “nëse ai është ende gjallë”. Ndërkohë, agjencia e lajmeve Tasnim me bazë në Teheran pretendoi se ndaj kryeministrit izraelit kishte “presion për të përgënjeshtruar thashethemet për vdekjen ose plagosjen e tij”.

Më herët, Trupat e Gardës Revolucionare Islamike (IRGC) të Iranit janë zotuar se do ta “ndjekin dhe vrasin” Benjamin Netanyahun nëse ai është gjallë, duke e cilësuar atë një “kriminel që vret fëmijë”.

Sipas raportimit të agjencisë AFP, e cila citon mediat iraniane Sepah, IRGC deklaroi: “Nëse ky kriminel që vret fëmijë është gjallë, ne do të vazhdojmë ta ndjekim dhe ta vrasim me forcë të plotë”.

Paralajmërimi i Gardës Revolucionare erdhi pasi ushtria izraelite ishte zotuar më herët të vriste udhëheqësin e ri suprem të Iranit, Mojtaba Khamenei.