Thellohet mjerimi në Rafa, OKB: Gjysmë milionë palestinezë janë zhvendosur nga lufta

Afërsisht gjysmë milionë palestinezë janë zhvendosur gjatë ditëve të fundit si pasojë e përshkallëzimit të operacioneve ushtarake izraelite në jug dhe veri të Gazës, njoftojnë Kombet e Bashkuara.

Rreth 360 mijë palestinezë u larguan nga Rafahu, në jug të Gazës, gjatë javës së shkuar, tha Agjencia e Kombeve të Bashkuara për refugjatët palestinezë. Përpara se sa Izraeli të ndërhynte në Rafah, atje strehoheshin rreth 1, 3 milionë palestinezë. Autoritetet izraelite thonë se në Rafah gjendet baza e fundit e Hamasit.

Trupat izraelite po luftojnë militantët e Hamasit edhe në veri të Gazës, ku ushtria ndërmorri një operacion të madh në fillim të luftës.

Urdhrat për evakuim që u lëshuan të shtunën kanë detyruar zhvendosjen e më shumë se 100 mijë njerëzve deri më tani, tha për gazetarët të hënën zëvendës-zëdhënësi i OKB-së Farhan Haq.

Punonjësit e ndihmave po përballen me vështirësi për të shpërndarë ushqim, që sa vjen e mpaket, për qindra mijëra palestinezë për shkak të asaj që Izraeli e cilëson operacion të kufizuar në Rafah.

38 kamionë me miell mbërritën përmes pikës kufitare perëndimore Erez, një pikë hyrëse për në veri të Gazës, tha Abeer Etefa, zëdhënës i Programit Botëror të Ushqimit të Kombeve të Bashkuara.

Izraeli njoftoi hapjen e pikës kufitare të dielën.

Por asnjë ushqim nuk ka hyrë në dy pikat kryesore kufitare në jug të Gazës gjatë javës së fundit.

Të dyja vendkalimet pranë Rafahut, ishin të mbyllura gjatë së hënës.

LEXONI GJITHASHTU:

• Ministri i Mbrojtjes në Kosovë: Baza e NATO-s në Kuçovë, mesazh për Serbinë e Rusinë
• NATO zbarkon në Kuçovë, deputeti i PS: Çfarë do ndodhë në bazë