Tjetër proces për zjarrin e 2018 në Greqi, të mbijetuarit kërkojnë drejtësi

Të paktën 20 persona do të gjykohen sërish në Greqi në lidhje me zjarrin fatal të vitit 2018 në Mati, në Atikën Lindore.

Çështja është rihapur pas një vendimi të Prokurorisë së Athinës, pas vendimit të kontestuar të marrë në prill, kur u dënuan vetëm 5 nga 20 të pandehurit, ish-zyrtarë të skuadrave të shpëtimit. Ndërkohë, të mbijetuarit kërkojnë drejtësi.

“Ne e dinim që në fillim që rezultati i këtij gjyqi do të ishte zhgënjyes. Dhe ne mbetëm shumë të zhgënjyer për shkak se e ndjemë se nuk ka drejtësi”, thotë Chrysa Gerakaki, e mbijetuar e zjarrit.

Athina Moutafi humbi të birin në det përpara syve të saj. Ajo luftoi për 6 orë për të shpëtuar të bijën dhe në fund ia doli. Pasi dëgjoi shqiptimin e vendimit 6 vjet më vonë nga ngjarja, ajo u dorëzua.

“Ishte shumë e vështirë për mua të dëshmoja. Duhet të thuash gjithçka të detajuar. Unë po luftoja në det. E njëjta gjë i ndodhi edhe sime bije, sepse përveç djalit kisha edhe vajzën e cila falë Zotit është ende gjallë. Ndaj kisha edhe barrën emocionale të vajzës sime në atë moment, sepse e di se sa e vështirë ishte”, shprehet Athina Moutafi, e mbijetuar.

Tani atyre u duhet të përjetojnë sërish momentet tragjike në Gjykatën e Apelit. E njëjta gjë vlen për Aris Herouvim, i cili humbi të ëmën, motrën dhe dy mbesat binjake nga zjarri.

Tani ka nisur gara me procesin e dytë që do të fillojë këtë vit, pasi deri në 2026-n nuk do të ketë një vendim final, që do të thotë se me një vendim nga Gjykata e Lartë, çdo detyrim do të anulohet.

LEXONI GJITHASHTU:

• Kakavijë, përfundojnë Pashkët nis kthimi i emigrantëve në Greqi
• Lirohet kreu i Agimit të Artë në Greqi