Tragjedi në Meksikë/ Treni përplaset me autobus, 8 të vdekur dhe 45 të plagosur

Një aksident i rëndë ka ndodhur mëngjesin e së hënës në veriperëndim të Meksikës, ku një tren është përplasur me një autobus me dy kate, duke lënë të paktën 8 persona të vdekur dhe 45 të tjerë të plagosur.

Ngjarja tragjike u regjistrua në qytetin industrial të Atlacomulco, në një zonë të mbushur me depo dhe fabrika. Sipas Agjencisë së Mbrojtjes Civile të shtetit të Meksikës, ekipet e emergjencës ndodhen ende në vendngjarje, ku po vijojnë operacionet për të shpëtuar të mbijetuarit dhe për të sqaruar shkaqet e aksidentit.

Pamje të publikuara në rrjetet sociale tregojnë momentin dramatik kur treni godet me shpejtësi autobusin, i cili ndodhej i bllokuar në një kryqëzim pa sinjalistikë apo barriera sigurie. Në video, autobusi shihet duke lëvizur ngadalë në një zonë me trafik të dendur, kur treni shfaqet papritur dhe e përplas fuqishëm në mes, duke e nxjerrë jashtë shinave.

Një tjetër video pas përplasjes tregon pamje tronditëse të autobusit të dëmtuar rëndë, me çatinë e çarë dhe pasagjerë të bllokuar brenda tij, ndërsa treni kishte ndaluar disa metra më tutje.

Autoritetet ende nuk kanë dhënë një version zyrtar për shkaqet e aksidentit, por dyshohet se mungesa e sinjalistikës rrugore dhe trafiku i rënduar në zonë kanë qenë faktorë kyç në këtë tragjedi.

Hetimet janë në vijim, ndërkohë autoritetet lokale kanë shprehur ngushëllimet për familjet e viktimave dhe kanë bërë thirrje qytetarëve të shmangin zonën për të mos penguar punën e ekipeve të shpëtimit.

LEXONI GJITHASHTU:

• Muri SHBA-Meksikë do të lyhet me të zezë për të ndaluar emigrantët të ngjiten
• Presidentja e Meksikës kundër Trump: Nuk do të lejojmë në Meksikë ushtrinë amerikane