Tre skenarë të mundshëm për ndarjen e mandateve në qarkun e Elbasanit, Blendi Çeka analizon në “Barometri Politik”

Blendi Çeka, pedagog në Universitetin e Tiranës tha në studion e “Barometri Politik” se qarku i Elbasanit, në këndvështrimin e tij, është shumë i ngjashëm me atë të Durrësit.

Ngjashmërinë mes këtyre dy qarqeve e vuri në pah nisur nga fakti se në të dy ka 14 mandate.

Duke ju referuar sondazhit të kryer nga Euronews Albania në bashkëpunim me kompaninë prestigjoze MRB, pedagogu e analizoi duke parashtruar skenarin e parë të mundshëm që Partia Socialiste të marrë tetë mandate dhe ajo Demokrate gjashtë.

“Në këtë raportin tetë me gjashtë është ekzakt që gjashta e Partisë Demokratike është e palëvizur, të paktën sipas sondazhit. Ndërkohë që është në konkurrim, numri tetë i Partisë Socialiste si mandat dhe numri i parë i Lëvizjes Socialiste për Integrim,” – tha Çeka.

Referuar kësaj, pedagogu Çeka komentoi se LSI-ja në tetë vite ka marrë nga dy mandate në qarkun e Elbasanit, pra rreth 18-20 mijë vota, ndërkohë që për të marrë një mandat duhen pak a shumë 10 mijë e 500 vota.

“Është në limit (LSI-ja) të them të drejtën, dhe do të jetë interesante për të parë këtë skenar, se si do të shkojë,” – tha pedagogu.

Teksa la pas skenarin tetë me gjashtë dhe LSI-në që nuk e merr mandatin, Blendi Çeka analizoi edhe një tjetër skenar të mundshëm nëse LSI merr mandatin dhe raporti është 7-6-1, pra një barazim shtatë me shtatë mes mazhorancës dhe opozitës.

Sipas tij të dy këto skenarë kanë probabilitet të ngjashëm për të ndodhur.

“Skenari i tretë që opozita të marrë tetë mandate, do të thotë që LSI-ja të marrë një mandat dhe PS-ja të shkojë një votë më shumë sesa Partia Demokratike më duket shumë e vështirë,” – përfundoi Çeka.

LEXONI GJITHASHTU: 

• Manjani: Në kulmin e saj PS mori 7 mandate në Elbasan, e pamundur të marrë 8
• Ylli Manjani evidenton dy problemet madhe të LSI në zgjedhjet e 25 prillit