Trump: Afrimi i Britanisë me Kinën është shumë i rrezikshëm

Donald Trump deklaroi se është “shumë e rrezikshme” që Mbretëria e Bashkuar të thellojë marrëdhëniet e biznesit dhe investimeve me Kinën, duke reaguar ndaj marrëveshjeve të njoftuara pas takimit të kryeministrit britanik Sir Keir Starmer me presidentin kinez Xi Jinping.

Presidenti amerikan i bëri komentet gjatë premierës së një dokumentari për bashkëshorten e tij, Melania Trump, kur u pyet për afrimin ekonomik mes Londrës dhe Pekinit. “Epo, është shumë e rrezikshme që ata ta bëjnë këtë”, tha Trump.

Në reagim ndaj deklaratave të presidentit amerikan, Downing Street bëri të ditur se Uashingtoni kishte qenë i informuar paraprakisht për udhëtimin e Sir Keir në Kinë dhe objektivat e tij. Zyra e kryeministrit theksoi gjithashtu se vetë Trump pritet të vizitojë Kinën në prill.

Trump nuk dha detaje të tjera lidhur me angazhimin e Mbretërisë së Bashkuar me Kinën, por e zhvendosi vëmendjen te Kanadaja, duke dhënë një paralajmërim të ngjashëm. “Është edhe më e rrezikshme, mendoj, për Kanadanë”, tha ai, duke shtuar se “Kanadaja nuk po ecën mirë” dhe se Kina “nuk mund të shihet si zgjidhje”.

Më herët gjatë javës, Trump kishte kërcënuar vendosjen e tarifave ndaj Kanadasë nëse ajo do të vazhdonte me marrëveshjet ekonomike me Kinën, pas një vizite të kryeministrit Mark Carney në Pekin.

Komentet e Trump vijnë në një kohë kur Sir Keir Starmer ka vlerësuar pozitivisht marrëdhëniet me Kinën. Pas takimit me Xi Jinping në Sallën e Madhe të Popullit në Pekin, ai deklaroi se raportet mes dy vendeve ndodhen në një “fazë të mirë dhe të fortë”. Të premten, Starmer tha se bisedimet kishin siguruar “pikërisht nivelin e angazhimit që shpresonim”, duke theksuar se Mbretëria e Bashkuar “ka shumë për të ofruar”.

Nga vizita tre-ditore në Kinë kanë dalë disa rezultate konkrete, përfshirë një marrëveshje për udhëtimin pa viza, uljen e tarifave për uiskin britanik dhe një investim prej 10.9 miliardë paundësh nga AstraZeneca për ndërtimin e kapaciteteve prodhuese në Kinë. Janë njoftuar gjithashtu marrëveshje për bashkëpunim në fusha si krimi i organizuar dhe emigracioni i paligjshëm.

Kryetari i Dhomës Britanike të Tregtisë në Kinë, Chris Torrens, e cilësoi vizitën e Starmer në Pekin si të suksesshme, duke theksuar se Kina është një nga partnerët më të mëdhenj tregtarë të Mbretërisë së Bashkuar. Ai shtoi se edhe liderë të tjerë perëndimorë kanë vizituar ose pritet të vizitojnë Pekinin, përfshirë Trump.

Vizita e Sir Keir Starmer ka nxitur kritika nga opozita britanike. Sekretari i Brendshëm në hije, Chris Philp, e akuzoi kryeministrin se po sakrifikon sigurinë kombëtare për përfitime ekonomike.

Sipas të dhënave zyrtare, SHBA-të ishin partneri më i madh tregtar i Mbretërisë së Bashkuar në vitin 2025, ndërsa Kina renditej e katërta.