Trump i dorëzoi Putinit një letër personale nga gruaja e tij Melania

Zonja e Parë e Shteteve të Bashkuara, Melania Trump, i ka dërguar një letër personale presidentit rus Vladimir Putin, ku shpreh shqetësimin për rrëmbimet e fëmijëve gjatë luftës në Ukrainë, konfirmuan dy zyrtarë të Shtëpisë së Bardhë.

Letra iu dorëzua Putinit nga Presidenti i SHBA-së, Donald Trump, gjatë një samiti në Bazën Ajrore Elmendorf-Richardson në Alaska, thanë zyrtarët për Reuters.

Melania Trump, e cila nuk mori pjesë në takim, në letër iu referua situatës së vështirë të fëmijëve të prekur nga lufta në Ukrainë dhe Rusi.

Përmbajtja e letrës nuk u bë publike, por zyrtarët thanë se përmendeshin konkretisht rrëmbimet e fëmijëve.

Kievi akuzon Moskën për transferimin me forcë të dhjetëra mijëra fëmijëve në territorin rus ose në zonat nën pushtimin rus, pa pëlqimin e prindërve ose kujdestarëve të tyre.

Autoritetet ukrainase e konsiderojnë atë një krim lufte dhe gjenocid sipas përkufizimit të OKB-së.

Rusia i mohon këto pretendime dhe pretendon se evakuoi fëmijët nga zonat e luftës për mbrojtjen e tyre.