Presidenti amerikan Joe Biden ka akuzuar paraardhësin Donald Trump dhe mbështetësit e tij se po minojnë demokracinë në prag të zgjedhjeve të mesmandatit, që mbahen javën e ardhshme.
“Mos bëni gabime, në lojë është demokracia për të gjithë ne”, deklaroi Biden, duke iu referuar kërcënimeve të disa kandidatëve republikanë se nuk do të pranojnë rezultatin e zgjedhjeve në rast se humbasin.
Nga ana e tyre, kundërshtarët e Biden u përgjigjën duke e akuzuar atë se po përpiqet të përçajë dhe devijojë drejtimin e Shteteve të Bashkuara.
Në lojë në zgjedhjet e 8 nëntorit është kontrolli i të dyja dhomave të Kongresit. Sondazhet sugjerojnë se republikanët do të marrin nën kontroll Dhomën e Përfaqësuesve, ndërsa Senati mund t’u shkojë demokratëve.
Përbërja politike e dhomave ka një rëndësi të veçantë për mënyrën se si presidenti Biden dhe partia e tij mund të kalojnë ligjet.
Në fjalimin e tij, Biden akuzoi më tej Trump se ka nxitur urrejtjen dhe zemërimin që kur refuzoi të pranonte rezultatet e zgjedhjeve presidenciale të 2020-s.
Gjithashtu, duke iu referuar sulmit të fundit ndaj bashkëshortit të kryetares së Kongresit, Nancy Pelosi, ai tha se dhuna ishte pasojë e gënjeshtrave dhe mashtrimeve të lindura nga një komplot dashakeq.
LEXONI GJITHASHTU