Trump “kërcënon” të tërhiqet nga takimi me Xi Jinping: Po bëhen shumë armiqësorë

Presidenti amerikan, Donald Trump ka kërcënuar se do të tërhiqet nga takimi i cili pritet të ndodhë këtë muaj me homologun e tij kinez, Xi Jinping, pasi Pekini shtrëngoi rregullat për eksportet e metaleve të rralla.

Në një postim në rrjetet sociale, Trump tha se tani nuk sheh asnjë arsye për t’u takuar me Presidentin Xi gjatë këtij muaj, duke akuzuar Kinën se po bëhet shumë armiqësore dhe po përpiqet ta mbajë botën rob.

Ai kërcënoi gjithashtu një rritje masive të tarifave për mallrat kineze, duke treguar një rikthim të tensioneve të reja tregtare midis dy gjigantëve ekonomikë. Përveç shtrëngimit të rregullave për eksportet e metaleve të rralla, Kina ka hapur një hetim monopoli ndaj firmës amerikane të teknologjisë Qualcomm, gjë që mund të pengojë blerjen e një prodhuesi tjetër çipash nga ana e saj.

Gjithashtu ka thënë se do të aplikojë tarifa të reja portuale për anijet që kanë lidhje me SHBA-në, duke përfshirë ato në pronësi ose të operuara nga firmat amerikane.

“Disa gjëra shumë të çuditshme po ndodhin në Kinë!”, shkroi Trump në një postim në rrjetet sociale të premten. “Ata po bëhen shumë armiqësorë.”

SHBA-ja dhe Kina kanë një marrëdhënie të brishtë tregtare që nga maji, kur të dyja palët ranë dakord të heqin tarifat treshifrore për mallrat e njëra-tjetrës, të cilat pothuajse kishin ndaluar tregtinë midis dy vendeve.

Zyrtarët kanë zhvilluar një sërë bisedimesh që atëherë për çështje që përfshijnë TikTok-un, blerjet bujqësore dhe tregtinë e teknologjisë së përparuar dhe metaleve të rralla të furnizuara nga Kina, të cilat janë komponentë kryesorë në makina, telefona inteligjentë dhe shumë artikuj të tjerë.