Trump paralajmëron sanksione të reja ndaj Rusisë, kërkon paqe në Ukrainë

Presidenti amerikan Donald Trump ka paralajmëruar presidentin rus Vladimir Putin për mundësinë e vendosjes së sanksioneve shtesë, nëse Moska nuk pranon të nisë bisedime për paqen në Ukrainë. Trump ka theksuar se qëllimi kryesor është ndalimi i konfliktit që ka nisur me pushtimin rus në shkallë të gjerë në vitin 2022.

“Duket se po,” tha Trump më 21 janar në Shtëpinë e Bardhë, kur u pyet nga gazetarët nëse do të vendoseshin masa të reja ndëshkuese ndaj Rusisë nëse Putin nuk i bashkohet tavolinës së negociatave. Trump shtoi se planifikon të bisedojë me Putinin “shumë shpejt”, ndërsa theksoi se tashmë është në kontakte me presidentin ukrainas Volodymyr Zelensky, i cili sipas tij ka shprehur dëshirën për një marrëveshje paqeje.

“Ne po bisedojmë me udhëheqësin ukrainas, Volodymyr Zelensky. Do të flasim me presidentin Putin shumë shpejt. Do ta shikojmë”, tha Trump.

Përveç Rusisë, Trump ka kërkuar edhe përfshirjen e Kinës në zgjidhjen e konfliktit. Gjatë një bisede telefonike me presidentin kinez Xi Jinping, ai ka bërë thirrje për angazhim në përpjekjet për ndalimin e luftës.

Shtetet e Bashkuara kanë vendosur një sërë sanksionesh ndaj Rusisë që nga nisja e agresionit në Ukrainë, por situata mbetet e tensionuar ndërsa bisedimet për paqe ende nuk janë realizuar.

LEXONI GJITHASHTU:

• Trump: Putini “po shkatërron Rusinë” duke mos arritur një marrëveshje me Kievin
• Putin telefonon presidentin kinez, diskutojnë rikthimin e Trump në Shtëpinë e Bardhë