Trump për infrastrukturën iraniane: Mund t’i fik centralet brenda 1 ore, por po përpiqem ta shmang këtë gjë

Donald Trump deklaroi se Shtetet e Bashkuara të Amerikës po përpiqen të shmangin dëme të mëdha në infrastrukturën e Iranit, pavarësisht tensioneve dhe sulmeve të fundit në rajon.

Gjatë një interviste Trump tha se disa objektiva strategjike në Teheran nuk janë goditur qëllimisht për të shmangur shkatërrime afatgjata.

“Kam lënë shumë infrastrukturë në Teheran sepse, nëse e shkatërron, do të thotë vite ndërtimi,” tha ai. Trump shtoi se SHBA mund të ndërpresin energjinë elektrike në Iran “brenda një ore”, por theksoi se një veprim i tillë do të sillte vite rindërtimi dhe pasoja të rënda për vendin.

Sipas tij, ky është edhe arsyeja pse po përpiqet të shmangë goditje të tilla. Ndërkohë, Irani ka paralajmëruar se mund ta zhysë të gjithë rajonin në errësirë nëse sulmohet rrjeti i tij elektrik.

Trump deklaroi gjithashtu se forcat amerikane nuk kanë goditur tubacionet e naftës gjatë sulmit të fundit në Ishulli Kharg disa ditë më parë.

“Ishulli Kharg është jashtë funksionit, përveç tubacioneve, të cilat i lashë. Nuk doja t’i prekja tubat sepse duhen vite punë për t’i montuar,” tha ai.

Nga ana tjetër, autoritetet iraniane kanë akuzuar SHBA-në dhe Izraelin se sulmet ajrore kanë shkaktuar dëme të mëdha në objektet civile, përfshirë ndërtesa banimi, shkolla dhe spitale.