Trump: SHBA do të paraqesin së shpejti dhe planin për Bregun Perëndimor

Presidenti amerikan Donald Trump ka paralajmëruar një deklaratë të rëndësishme në lidhje me Bregun Perëndimor, pas komenteve të tij për situatën në Gaza.

Gjatë një konference për shtyp, Trump u pyet nga një gazetar mbi qëndrimin e tij ndaj okupimit izraelit të Bregut Perëndimor. Ai u përgjigj se njerëzve “u pëlqen ideja” e pretendimit të sovranitetit izraelit mbi këtë territor, por shtoi se administrata e tij ende nuk ka marrë një pozicion zyrtar.

“Diskutimet me përfaqësuesit izraelitë janë në zhvillim e sipër dhe ne do të bëjmë një njoftim ndoshta për atë temë shumë specifike gjatë katër javëve të ardhshme”, tha Trump.

Sipas ligjit ndërkombëtar, Bregu Perëndimor njihet si territor palestinez, por shumë izraelitë e shohin atë si pjesë të atdheut të tyre biblik dhe kërkojnë sovranitetin izraelit mbi të. Vendbanimet izraelite në këtë zonë janë të paligjshme sipas ligjit ndërkombëtar.

Muajin e kaluar, Trump nënshkroi një urdhër ekzekutiv për heqjen e sanksioneve kundër kolonëve izraelitë të dhunshëm në Bregun Perëndimor të pushtuar. Gjatë mandatit të tij të mëparshëm presidencial, ai njohu Jerusalemin, një pjesë e të cilit ndodhet në Bregun Perëndimor, si kryeqytetin e Izraelit dhe urdhëroi zhvendosjen e ambasadës amerikane nga Tel Avivi në Jerusalem.