Trump sinjalizon mundësinë e normalizimit të marrëdhënieve me Sirinë

Ishte një takim i shkurtër, por i ngarkuar me simbolikë: Presidenti amerikan Donald Trump deklaroi se administrata e tij po shqyrton mundësinë e normalizimit të marrëdhënieve me Sirinë, pas një takimi të papritur me presidentin e përkohshëm sirian, Ahmed al-Sharaa, një ish-luftëtar që dikur kishte lidhje me Al-Kaedën.

Takimi, i zhvilluar në një pallat mbretëror në Riad dhe që zgjati 37 minuta, vjen vetëm pak muaj pas rënies së regjimit të gjatë të familjes Assad, rrëzuar nga forcat e al-Sharaa. “Mendoj se ai ka potencialin,” u shpreh Trump pas takimit.

Ishte një moment i paimagjinueshëm deri vonë – vetë al-Sharaa ka qenë më parë në listën e të kërkuarve të SHBA-së, me një shpërblim prej 10 milionë dollarësh për kapjen e tij, i cili u hoq në dhjetor të vitit të kaluar.

Pamjet nga takimi tregojnë një bisedë të kujdesshme përmes përkthyesit, mes një atmosfere formale dhe tensioni fillestar. Princi i Kurorës Saudite, Mohammad bin Salman, u pa ulur pranë tyre me një qëndrim entuziast, ndërsa Presidenti turk Recep Tayyip Erdogan mori pjesë në mënyrë virtuale përmes telefonit.

Sipas Trump, ishin pikërisht këta dy liderë rajonalë që ndihmuan në bindjen e tij për të hequr sanksionet ndëshkuese të SHBA-së ndaj Sirisë.

Njoftimi për këtë ndryshim të mundshëm kursi diplomatik u bë publik në një forum të përbashkët investimesh SHBA-Saudite, ku Trump u prit me duartrokitje në këmbë, pavarësisht qëndrimeve të tij të mëparshme se “SHBA-të nuk kishin interes në Siri”.