Trump urdhëron ushtrinë për veprime të drejtpërdrejta në kufirin me Meksikën

Presidenti amerikan Donald Trump urdhëroi ushtrinë që të ndërmarrë veprime të drejtpërdrejta përgjatë kufirit jugor drejt Meksikës për të bllokuar kalimin e emigrantëve për arsye të sigurisë kombëtare dhe zbatimi i këtyre masave tashmë është duke u zhvilluar në një sektor të kufirit, shkruan sot Latintimes.

Masat përfshijnë ndërtimin e barrierave, instalimin e pajisjeve të mbikëqyrjes dhe vendosjen e trupave për të kontrolluar pikat kufitare.

Ushtria amerikane tani ka autoritetin për të caktuar seksione të caktuara përgjatë kufirit si zona të mbrojtjes kombëtare, duke i lejuar ato të zgjerojnë përdorimin e forcës dhe të forcojnë kontrollet e hyrjes, sipas Latin Times.

Sipas kësaj media, pjesëtarët e ushtrisë amerikane mund të veprojnë në përputhje me rregullat e angazhimit ushtarak, në vend të rregulloreve civile, gjë që ngre çështjen e konfrontimit të mundshëm me emigrantët.

Më 20 janar, Trump nënshkroi një urdhër ekzekutiv që i dha ushtrisë një rol të sapopërcaktuar në mbrojtjen e integritetit territorial të SHBA-së duke mbyllur kufirin jugor me Meksikën dhe duke penguar atë që ai tha se ishte një pushtim i emigrantëve të paligjshëm.