Trump uron Vuçiçin në përvjetorin e shtetësisë: Do rrisim bashkëpunimin me Serbinë

Presidenti amerikan, Donald Trump e ka uruar presidentin e Serbisë, Aleksandër Vuçiç për ditën e shtetësisë së Serbisë që shënohet më 15 shkurt dhe ka thënë që pret se dy vendet do të forcojnë partneritetin dhe sigurinë për njerëzit e të dyja shteteve.

Vuçiq e ka publikuar letrën e dërguar nga Trumpi, në një postim në rrjetin social Instagram.

“Vlerësojmë jashtëzakonisht shumë kontributin e rëndësishëm të Serbisë në sigurinë ndërkombëtare, qoftë në mbështetjen për popullin e Ukrainës në mbrojtje nga agresioni rus, apo në kontributin e Serbisë në misione të shumta paqeruajtëse anembanë botës”, është thënë mes tjerash në letrën e Trumpit për Vuçiçin.

Ai ka shtuar se Shtetet e Bashkuara mbështesin plotësisht vazhdimin e integrimeve të Serbisë në rrugën euroatlantike, si dhe përpjekjet e saj për promovimin e marrëdhënieve paqësore dhe të begata me fqinjët dhe partnerët në rajon.

“Mezi pres të forcojmë më tej partneritetin tonë, duke u mbështetur në lidhjet gjithnjë e më të fuqishme mes vendeve tona, për të kontribuar së bashku në rritjen e sigurisë dhe përparimit të qytetarëve të Serbisë dhe SHBA-së”, është thënë mes tjerash në urimin e Trumpit.

Presidenti amerikan, ka theksuar, gjithashtu, se është i kënaqur me “bashkëpunimin gjithnjë e më intensiv dhe mundësitë e reja” për investime të ndërsjella në sektorë të rëndësishëm si teknologjia dhe energjia.

LEXONI GJITHASHTU:

• Trump nënshkruan dekretin për 25% tarifa ndaj importeve të çelikut dhe aluminit
• Trump: Armëpushimi duhet të anulohet nëse Hamasi nuk liron pengjet deri të shtunën